Kolbrún hættir í ART teyminu
Nú hefur Kolbrún hætt störfum hjá ART teyminu. Þökkum við henni þá ötulu vinnu sem að hún hefur sinnt síðast liðin þrjú ár hér í teyminu. Óskum við henni velfarnaðar í nýju starfi.
ART teymið
Leikskólinn Leikholt fær ART-vottun
Við útskriftarathöfn á leikskólanum Leikholti í gær fékk skólinn afhent skjal frá ART-teyminu sem staðfestir ART-vottun skólans næstu 3 árin. 6 af 8 starfsmönnum á deildum leikskólans hafa þegar lokið ART-námskeiði og von er á síðustu tveimur eftir sumarið.
Til hamingju Leikholt og haldið áfram með ykkar flotta og öfluga ART starf
Magnús Hlynur Hreiðarsson tók myndirnar.
Að tala er málið
Föstudaginn 15. apríl síðastliðinn var boðið til samtals í Víkurskóla. Um var að ræða viðburð undir yfirskriftinni ,,Að TALA er málið“ og stóð hann yfir í um klukkustund. Kolbrún Hjörleifsdóttir kennari í grunnskólanum í Vík stóð fyrir viðburðinum og kynnti hugmyndina fyrir viðstöddum. Í verkefninu er orðið TALA miðpunkturinn. Orðið TALA getur haft þrennskonar merkingu og gefur það möguleika á að vinna með orðið á skemmtilegan hátt og vekja um leið athygli á mikilvægi þess að við tölum saman og eigum góð samskipti.
ART-teyminu var boðið á viðburðinn og hélt Kolbrún Sigþórsdóttir smá tölu fyrir viðstadda og ræddi efni dagsins út frá ART-inu. Til dæmis mikilvægi þess að vanda sig þegar maður TALAr við aðra og mikilvægi þess að hlusta þegar að aðrir TALA.
Að lokum var unnið í litlum hópum og skrifaðar niður setningar af ýmsum toga sem innihéldu orðið TALA. Á meðan að hópavinnan fór fram var fólk kvatt til þess að TALA saman.
