Það hefur verið nóg um að vera hjá ART-teyminu síðustu vikur og haustið fer sannarlega skemmtilega af stað!

Við höfum haldið tvö ART-réttindanámskeið, eitt á Selfossi og annað á Akureyri. Það er virkilega ánægjulegt að sjá áhugann á ART og gaman að fylgjast með nýjum ART-þjálfurum bætast í hópinn víða um land.

Við fengum svo tækifæri til að deila reynslu af ART með starfsfólki skóla á Fræðsludegi Árborgar þann 20. ágúst. Þar hélt ART-teymið vinnustofu fyrir starfsfólk leik- og grunnskóla þar sem Selma Harðardóttir fjallaði um ART út frá eigin reynslu. Hún sagði frá því hvernig hún hefur nýtt ART í kennslu, hvernig hægt er að flétta ART inn í daglegt skólastarf og hvaða áhrif það hefur haft á nemendahópinn og hana sjálfa sem kennara.

Það er  ánægjulegt að fá tækifæri til að deila reynslu og hugmyndum um hvernig ART getur orðið hluti af daglegu starfi og sjá áhugann á því að nýta ART víðar.

Við hlökkum til áframhaldsins og allra þeirra spennandi verkefna sem fram undan eru í haust!

Hildur Bjargmundsdóttir hefur verið ráðin til starfa í ART-teymi Suðurlands og mun hún hefja störf þann 1. ágúst næstkomandi. 

Hildur býr yfir mikilli menntun og reynslu á sviði kennslu og skólamála. Hún er með B.Sc. gráðu í landafræði og kennsluréttindi fyrir bæði grunn- og framhaldsskóla. Þá er hún með M.T. gráðu í menntun án aðgreiningar. Frá árinu 2004 hefur Hildur starfað við kennslu í grunnskólum og því vel kunnug þeim áskorunum og tækifærum sem fylgja skólastarfi. Hún hefur undanfarin ár gegnt starfi deildarstjóra sérkennslu við Stekkjaskóla á Selfossi og verið hluti af stjórnendateymi skólans frá því hann var opnaður.

Við bjóðum Hildi hjartanlega velkomna til starfa í ART-teymi Suðurlands.