Fréttir

Miðvikudaginn 17. desember fékk Þjórsárskóli ART vottun. Allir umsjónarkennarar skólans eru búnir að fara á ART réttinda námskeið, ART tímar eru fastir í stundatöflum nemenda, starfsfólk skólans er vel upplýst um efnið og ART er sýnilegt í námskrá og skipulagi skólastarfsins.
Starfsfólk og nemendur skólans voru búnir að undirbúa fallega athöfn í tilefni dagsins og buðu upp á heitt kakó og smákökur sem nemendur höfðu bakað. Hafdís, einn umsjónarkennara skólans sagði frá hvernig ART hefur þróast í Þjórsárskóla en fyrstu kennarar skólans sóttu ART námskeið árið 2009. Nemandi úr 5. bekk sagði frá reynslu sinni af ART og hvernig hann hefur notað þær aðferðir til þess að hjálpa sér og bæta sig í samskiptum.
Við óskum starfsfólki og nemendum Þjórsárskóla innilega til hamingju með ART vottunina!

Fleiri gleðifréttir frá ART teyminu á Suðurlandi.  Þann 26. nóvember síðastliðinn var fyrsti grunnskólinn utan Suðurlands ART vottaður en það var Grunnskólinn á Þórshöfn. Mikið og gott ART starf hefur farið þar fram síðasta skólaárið og hafa allir starfsmenn skólans fengið ART námskeið. Skólinn er nú með ART í föstum tímum í stundatöflu og fjallað er um ART í skólanámskrá skólans. Þannig er tryggt að nemendur á yngsta- , mið- og elsta stigi skólans fái ART þjálfun þar sem áhersla er lögð á að bæta félagsfærni, sjálfsstjórn og siðferði nemenda út frá Aðalnámskrá grunnskóla.
Við óskum starfsfólki og nemendum Grunnskólans á Þórshöfn innilega til hamingju með ART vottunina.